9 Jun 11
Jes, mi ŝatas Tumblr‘on. Tiu ĉi blogejo estas ege simpla, bela kaj oportuna. Almenaŭ por mi. Tial post sufiĉe longa vivo en WordPress revenas denove al tiu ĉi blogejo. Kaj ĉiu scias, ke mi ŝategas mian poŝtelefonon HTC Hero kun Androido. Iam, tuj post mi akiris la telefonon, ekzistis neniu aplikaĵo por blogi ĉe Tumblr per Androido, eblis nur blogi retpoŝte. Nun jam estas alia tempo, kaj mi trovis multe da aplikaĵoj por tio! Mi provis ilin, kaj jen estas la rezulto.
Por mi tre gravaj estas la jenaj eblecoj de aplikaĵo: (1) subteno de Unikodo (por blogi ruslingve kaj en Esperanto), (2) subteno de Markdown, ĉar mi preferas ĉiam uzi ĝin anstataŭ HTML, kaj Tumblr mem plene subtenas ĝin, kaj (3) kromaj agordoj por indiki privatecon, celan blogon kaj por tviti pri la afiŝo.
Daŭrigo »
9 Jun 11
Antaŭ nelonge mi provis novan filmon — Kodak Ektar 100. Kaj ĝi fariĝis mia plej ŝatata kolora filmo, ĉar ĝi donas perfektajn kolorojn kaj kontraston. Inter nigra-blankaj mi preferas Ilford Delta 400 — ĝi estas same perfekta! :)
9 Jun 11
Morgaŭ post laboro ni ekveturos vilaĝen. Ankoraŭ ne estos ferioj, ja postmorgaŭ mi devos deĵori, sed jam lastan fojon antaŭ la ferioj. Kaj mi povas deĵori «el arbaro» — ja por mia laboro mi bezonas nur komputilon kaj interreton. Kaj interreton al mi provizas mia poŝtelefono. Ĉio simplas nuntempe. :)
Verŝajne, mi baldaŭ afiŝos freŝajn fotojn faritajn en la arbaro kaj vilaĝo. Do, atendu… ;)
8 Jun 11
Bona somera vetero — varma, suna kaj iom venteta. ;)
7 Jun 11
Saluton, karaj gelegantoj de la blogo!
Mi volas informi vin, ke la blogo «Bagateloj» relokiĝas al nova domajno. Ekde nun (kaj mi esperas, por ĉiam) ĝi estos atingebla laŭ la adreso bagateloj.org.
La malnova blogo ĉe bagateloj.oramezo.org kaj la tuta retejo oramezo.org dum kelka tempo restos «vivaj» — novaj blogaĵoj aperu samtempe en ambaŭ blogoj almenaŭ ĝis mi finos ĉiujn necesajn agordojn por la nova versio de «Bagateloj».
Kaj jes, mi revenas al Tumblr, ĉar ĝi tre plaĉas al mi malgraŭ ke ĝi havis problemojn en pasinteco. Ĝi estas la plej oportuna blogejo por mi.
Du vortojn pri komentoj. Fakte, miaj blogaĵoj kutime ricevas komentojn ege rare. Krome, mi mem ne tre ŝatas komentojn ĉi-tie. En la nova blogo jam eblas komenti per Twitter, kaj baldaŭ mi verŝajne aldonos eblecon komenti per Fejsbuko — nuntempe tio pli ol sufiĉas.
Dankon pro via atento kaj bonvenon al la nova blogo!
4 Jun 11
Ĉu mi havu unu-nuran blogon anstataŭ du apartajn? Iam mi decidis havi apartajn blogojn por la rusa kaj Esperanto, sed nun mi dubas ĉu tio estas bona ideo. Do, mi nur pripensas la aferon…
4 Jun 11
Mi planas registri apartan domainon por tiu ĉi blogo. Kaj mi ankaŭ planas tute rezigni de la nuna oramezo.org post kelka tempo. La translokiĝo al la nova domaino okazos ne tuj kaj ne subite, sed ŝtupe: unue la nova domaino estos registrita kaj la blogo atingeblos per la malnova kaj nova domainoj samtempe. Dum tiu transira periodo mi petos ĉiujn ĝisdatigi ligilojn al mia blogo. Finfine oramezo.org mortos sed la blogo plu evoluos en ia nova loko. Mi jam ŝanĝis nomon de mia esperantlingva tvitero — nun ĝi nomiĝas @bagateloj.
Interalie, hieraŭ mi registris dmych.org por mia taglibro/fotoblogo ĉe Tumblr.
2 Jun 11
Hodiaŭ la filantropia fondaĵo «Vivo kiel miraklo» publikigis raporton pri la okazinta festo kun miaj fotoj. :)
Daŭrigo »
30 Maj 11
Daŭrigo »
28 Maj 11
Daŭrigo »
27 Maj 11
Mi jam kelkfoje skribis pri Androidaj aplikaĵoj por fotistoj. Ĝis nun mi pli-malpli konstante uzis du programojn: FxCamera kaj Camera360. Sed ŝajnas al mi, ke io nova baldaŭ plene anstataŭos ambaŭ aplikaĵojn. Temas pri Vignette — ege oportuna kaj potenca fotilo por Android. Kaj ĝi estas malgranda! Vignette okupas nur 504K en mia telefono dum FxCamera postulas 2M — kvaroble pli multe!
Krome, Vignette povas esti uzata por redakti fotojn, jam fotitaj per ĝi aŭ per ia alia programo. Eblas apliki la samajn efektojn kaj kadrojn kaj konservi redaktitajn fotojn. Ankaŭ eblas konservi versiojn de foto kun diversaj efektoj aplikitaj al ĝi. Do, mi ne priskribu ĉion detale. Vi simple instalu demonstran version por provi mem (demonstra versio permesas konservi fotojn nur en la plej malgranda dimensio — ŝajnas, ke tio estas la unu sola diverseco de la plena pagata aplikaĵo).
25 Maj 11
La filmo estas malnova — mi fotis ĝin verŝajne antaŭan someron, sed mi ne certas. :)
Daŭrigo »
24 Maj 11
Strange. Ĉiu mia blogo ĉiam fariĝas fotoblogo. Pli kaj pli da fotoj, kiujn mi strebas montri al la mondo, malpli kaj malpli da tekstoj… Kaj jen, subite mi trovis ke ankoraŭ unu blogo enhavas nur fotojn sen iaj tekstaj priskriboj…
24 Maj 11
Saluton! Jen estas mi. :)
24 Maj 11
De tempo al tempo oni petas permeson uzi tiun aŭ alian foton en sia blogo, retpaĝo ktp. Mi mem delonge afiŝas la fotojn en Ipernity, Flickr k.s. retejoj, uzantaj permesilon Krea Komunaĵo por sia enhavo.
Do, miaj fotoj estas same uzeblaj laŭ la sekvaj kondiĉoj: «CC: Atribuo + Nekomerca + Neniuj derivaĵoj». Vi ĉiam rajtas senpage kaj nekomerce uzi neŝanĝitajn fotojn se vi ĉiam indikas la aŭtoron (min).
Kiel atribui? Sub la foto aldonu la tekston «Foto: Dmitri Breĉalov» aŭ «© Dmitri Breĉalov» aŭ kun mia pseŭdonomo: «Foto: Ora Mezo» kun ligilo al tiu ĉi blogo (aŭ la paĝo kie vi trovis la foton). Dankon.
24 Maj 11
Matene pluvegis. Grizaj malaltaj nubegoj kovris la ĉielon. La nubegoj estis tiom malaltaj, ke Ostankinskaja turo estis videbla nur duone.
Tamen, post unu aŭ du horoj la nubegoj forkuris. Kaj nun estas klara, suna kaj freŝa vetero.
22 Maj 11
Jen estas kelkaj fotoj faritaj per mia nova fotilo Zenit ET, kiun mi akiris antaŭ nelonge. Nu, kion diri… La fotilo funkcias bone, kvankam la filmo okazis aĉa — mi ne plu aĉetu ion similan. La supra foto (vido el mia fenestro) estis farita per Jupiter 135/3.5 kaj la subaj — per Helios 44-M kun makrotuboj.
Daŭrigo »
19 Maj 11
Veŝajne ĉiu jam scias, kio estas Dropbox. Vere oportuna servo en surtablaj komputiloj. Ĝi ankaŭ havas aplikaĵon por Android. Sed al tiu ĉi aplikaĵo mankas aŭtomata sinkronigo — ĉiun dosieron oni devas el/alŝuti kaj sinkronigi permane.
En la Merkato jam aperis kelkaj aplikaĵoj por sinkronigi elektitajn dosierujojn en Android kun Dropbox. Mi provis verŝajne ĉiujn, sed ĉiuj ili ne taŭgas por miaj celoj aŭ simple ne funkcias.
Mi leteris al aŭtoroj de kelkaj aplikaĵoj, kaj jen unu el ili — la aŭtoro de TheRealSync informis min, ke li korektis la aplikaĵon kaj petis min testi ĝin. La programo ne plu eraras sinkronigante la enhavon de dosierujoj. Do, mi mem ekuzis ĝin kaj konsilas ĝin al ĉiuj.
Kion havigas la programo? Fonan sinkronigadon de ajnaj dosierujoj en SD-karto de via telefono kun dosjerujoj en Dropbox — eblas elekti periodon de 5 minutoj ĝis 24 horoj. las krei diversajn taskojn por diversaj celoj. La sinkronigado povas esti elŝuta, alŝuta aŭ ambaŭflanka. Ekzemple, vi povas krei unu taskon por alŝuti ĉiuhore viajn novajn fotojn en iu dosierujon en Dropbox, alian por elŝuti novajn librojn ĉiutage, kaj la trian — por konstante (ĉiuj 5 minutoj) sinkronigi viajn dokumentojn kun Dropbox.
La aplikaĵo estas pagata. Ĝia senpaga (testa) versio permesas sinkronigi ne pli ol 15 dosierojn en unu tasko.
Nun anstataŭ Simplenote kaj similaj servoj eblas uzi Dropbox kun TheRealSync kaj ajna simpla kaj oportuna tekstredaktilo laŭplaĉe. Avantaĝo de tiu rimedo kompare kun Simplenote k.s. estas tia, ke ĉiuj viaj dokumentoj, notoj ktp ĉiam estas en la disko de via komputilo kaj SD-karto de la poŝtelefono — eĉ se vi perdus Interretan konekton, aŭ eĉ la retservo mem malaperus, vi perdus nenion. Kaj kompare kun specialaj aplikaĵoj por konservi tekstajn notojn en Dropbox (ekzemple, Epistle) vi estas libera uzi ajnan formaton de dokumentoj — ne nur simplan tekston.
19 Maj 11
