24 Mar 11
Mi trovis bonegan programon pro blogi en Linukso. Eble, multaj geamikoj jam scias pri ĝi. La programo nomiĝas simple — Blogilo. Ĝi estas verkita por uzi en KDE, sed mi sukcesis instali kaj lanĉi ĝin en Gnome.
La programo taŭgas por blogoj Blogger kaj Blogspot, MetaWeblog, MovableType kaj WordPress. Ĝi havigas riĉan kaj oportunan grafikan fasadon, subtenon por kelkaj blogoj, alŝuto de bildoj ktp. Eblas eĉ antaŭvidi vian redaktatan blogaĵon en la etoso de via blogo! Vi povas verki kelkajn blogafiŝojn por kelkaj blogoj samtempe, vi povas redakti jam afiŝitajn blogaĵojn, vi povas konservi malnetojn en via komputilo… Do, ĝis nun mi ne vidis pli bonan… hm… blogilon por Linukso. :)
Instali la programon eblas per Ubuntu Software Service aŭ en konzolo: $ sudo apt-get install blogilo. Ankaŭ mi devis instali SQLite subtenon por ĝi: $ sudo apt-get install libqt4-sql-sqlite.
8 Feb 11
Mi instalis lanĉilon Cairo Dock en mian Ubuntu komputilon anstataŭ paneloj de GNOME. Nun mia labortablo aspektas simile al laŭmodaj Mac’oj. Fakte estas tre oportune, per tio mi ŝparis iom da spaco surekrane kaj nun la labortablo aspektas pli bele ol antaŭe (laŭ mia gusto).
Kiel instali? En Ubuntu 10.10 mi simple lanĉis tiun komandon: sudo apt-get install cairo-dock. Ankaŭ (kompreneble) eblas instali la pakaĵon per Ubuntu Software Center aŭ Synaptic Package Manager. Poste mi aldonis la aplikaĵon en Startup Applications kaj tute forviŝis la GMONE’ajn panelojn (por tio sufiĉas lanĉi gconf-editor kaj en branĉo /desktop/gnome/session forviŝi la elementon panel).
Ah, krome mi forviŝis la esperantan klavaron. ;) Anstataŭ mi ŝaltis «Supersignon» (la tria nivelo de la klavaragordoj) kaj nun mi tajpas ĉapelitajn literojn premante dekstran Alt-on kun konforma liter-klavo (Alt-c por «ĉ» ekz-e). Eble ne tiom oportunas kiel havi apartan klavararanĝon por Esperanto sed pli oportunas havi nur du klavararanĝojn anstataŭ tri. Mi ankaŭ ŝaltis «Compose key» por havi eblecon tajpi belajn citilojn «» kaj haltostrekon — rekte per klavaro en ajna redaktilo.
