Por mi tre gravaj estas la jenaj eblecoj de aplikaĵo: (1) subteno de Unikodo (por blogi ruslingve kaj en Esperanto), (2) subteno de Markdown, ĉar mi preferas ĉiam uzi ĝin anstataŭ HTML, kaj Tumblr mem plene subtenas ĝin, kaj (3) kromaj agordoj por indiki privatecon, celan blogon kaj por tviti pri la afiŝo.

Tumblr — la oficiala aplikaĵo de Tumblr mem. Ĝi estus la plej bona, se ĝia «Send to Twitter» flageto funkcius korekte. Mia noto estas 4 (el 5).

Tumblelog Beta — bela programo, kiu montras kontrolpanelon (Dashboard) en tre agrabla formo, sed ĝi fuŝas afiŝante tekstojn en aliaj lingvoj krom la angla — se vi provas redakri blogaĵon afiŝitan per ĝi, vi vidas, ke ĉiuj nelatinaj literoj tute ne legeblas, ili fariĝas HTML entities (Снова). Ege maloportune! Mia noto estas 3.

MyTumblr — pagata aplikaĵo (senpaga versio kun reklamo ankaŭ elŝuteblas). Sufiĉe bona programo, kiu tamen ne subtenas Markdown. Sed ĝi havigas multe pli! Ĝi ebligas aŭtomate renovigi la panelon (kaj informi pri aperintaj novaĵoj), ricevi mesaĝojn kaj respondi al ili, vidi la liston de sekvatoj kaj redakti ĝin — ja estas unikaj eblecoj inter ĉiuj similaj aplikaĵoj! Do, mia noto estas 4.

aTumble — tute ne subtenas Unikodon! Kaj fuŝe montras la panelon. Mia noto estas 1.

Tumblroid — pagata aplikaĵo (ekzistas ankaŭ senpaga stumpigita versio Tumblroid Lite havigas nur tekstajn afiŝojn). Sufiĉe bona, oportuna aplikaĵo, sed sen Markdown (almenaŭ en senpaga versio, la pagata havas agordon pri Markdown, sed neklaran, kaj ĝi ankaŭ ne funkcias normale, almenaŭ mi ne sukcesis afiŝi blogaĵon en Markdown). Mia noto estas 3.

ttTumblr — fakte ne tre belaspekta kaj oportuna por legi, sed havigas flekseblajn agordojn por blogi: privateco, markado, tvitero ktp. Mia noto estas 4.

Drumblr — simila al ĉiuj aliaj. Kaj sen Markdown. Mia noto estas 3.

Antaŭ nelonge mi provis novan filmon — Kodak Ektar 100. Kaj ĝi fariĝis mia plej ŝatata kolora filmo, ĉar ĝi donas perfektajn kolorojn kaj kontraston. Inter nigra-blankaj mi preferas Ilford Delta 400 — ĝi estas same perfekta! :)

Verŝajne, mi baldaŭ afiŝos freŝajn fotojn faritajn en la arbaro kaj vilaĝo. Do, atendu… ;)

Bona somera vetero — varma, suna kaj iom venteta. ;)

Mi volas informi vin, ke la blogo «Bagateloj» relokiĝas al nova domajno. Ekde nun (kaj mi esperas, por ĉiam) ĝi estos atingebla laŭ la adreso bagateloj.org.

La malnova blogo ĉe bagateloj.oramezo.org kaj la tuta retejo oramezo.org dum kelka tempo restos «vivaj» — novaj blogaĵoj aperu samtempe en ambaŭ blogoj almenaŭ ĝis mi finos ĉiujn necesajn agordojn por la nova versio de «Bagateloj».

Kaj jes, mi revenas al Tumblr, ĉar ĝi tre plaĉas al mi malgraŭ ke ĝi havis problemojn en pasinteco. Ĝi estas la plej oportuna blogejo por mi.

Du vortojn pri komentoj. Fakte, miaj blogaĵoj kutime ricevas komentojn ege rare. Krome, mi mem ne tre ŝatas komentojn ĉi-tie. En la nova blogo jam eblas komenti per Twitter, kaj baldaŭ mi verŝajne aldonos eblecon komenti per Fejsbuko — nuntempe tio pli ol sufiĉas.

Dankon pro via atento kaj bonvenon al la nova blogo!

Interalie, hieraŭ mi registris dmych.org por mia taglibro/fotoblogo ĉe Tumblr.

Hodiaŭ la filantropia fondaĵo «Vivo kiel miraklo» publikigis raporton pri la okazinta festo kun miaj fotoj. :)

Mi jam kelkfoje skribis pri Androidaj aplikaĵoj por fotistoj. Ĝis nun mi pli-malpli konstante uzis du programojn: FxCamera kaj Camera360. Sed ŝajnas al mi, ke io nova baldaŭ plene anstataŭos ambaŭ aplikaĵojn. Temas pri Vignette — ege oportuna kaj potenca fotilo por Android. Kaj ĝi estas malgranda! Vignette okupas nur 504K en mia telefono dum FxCamera postulas 2M — kvaroble pli multe!

Krome, Vignette povas esti uzata por redakti fotojn, jam fotitaj per ĝi aŭ per ia alia programo. Eblas apliki la samajn efektojn kaj kadrojn kaj konservi redaktitajn fotojn. Ankaŭ eblas konservi versiojn de foto kun diversaj efektoj aplikitaj al ĝi. Do, mi ne priskribu ĉion detale. Vi simple instalu demonstran version por provi mem (demonstra versio permesas konservi fotojn nur en la plej malgranda dimensio — ŝajnas, ke tio estas la unu sola diverseco de la plena pagata aplikaĵo).

La filmo estas malnova — mi fotis ĝin verŝajne antaŭan someron, sed mi ne certas. :)

Strange. Ĉiu mia blogo ĉiam fariĝas fotoblogo. Pli kaj pli da fotoj, kiujn mi strebas montri al la mondo, malpli kaj malpli da tekstoj… Kaj jen, subite mi trovis ke ankoraŭ unu blogo enhavas nur fotojn sen iaj tekstaj priskriboj…

Saluton! Jen estas mi. :)

De tempo al tempo oni petas permeson uzi tiun aŭ alian foton en sia blogo, retpaĝo ktp. Mi mem delonge afiŝas la fotojn en Ipernity, Flickr k.s. retejoj, uzantaj permesilon Krea Komunaĵo por sia enhavo.

Do, miaj fotoj estas same uzeblaj laŭ la sekvaj kondiĉoj: «CC: Atribuo + Nekomerca + Neniuj derivaĵoj». Vi ĉiam rajtas senpage kaj nekomerce uzi neŝanĝitajn fotojn se vi ĉiam indikas la aŭtoron (min).

Kiel atribui? Sub la foto aldonu la tekston «Foto: Dmitri Breĉalov» aŭ «© Dmitri Breĉalov» aŭ kun mia pseŭdonomo: «Foto: Ora Mezo» kun ligilo al tiu ĉi blogo (aŭ la paĝo kie vi trovis la foton). Dankon.

Matene pluvegis. Grizaj malaltaj nubegoj kovris la ĉielon. La nubegoj estis tiom malaltaj, ke Ostankinskaja turo estis videbla nur duone.

Tamen, post unu aŭ du horoj la nubegoj forkuris. Kaj nun estas klara, suna kaj freŝa vetero.

Jen estas kelkaj fotoj faritaj per mia nova fotilo Zenit ET, kiun mi akiris antaŭ nelonge. Nu, kion diri… La fotilo funkcias bone, kvankam la filmo okazis aĉa — mi ne plu aĉetu ion similan. La supra foto (vido el mia fenestro) estis farita per Jupiter 135/3.5 kaj la subaj — per Helios 44-M kun makrotuboj.

En la Merkato jam aperis kelkaj aplikaĵoj por sinkronigi elektitajn dosierujojn en Android kun Dropbox. Mi provis verŝajne ĉiujn, sed ĉiuj ili ne taŭgas por miaj celoj aŭ simple ne funkcias.

Mi leteris al aŭtoroj de kelkaj aplikaĵoj, kaj jen unu el ili — la aŭtoro de TheRealSync informis min, ke li korektis la aplikaĵon kaj petis min testi ĝin. La programo ne plu eraras sinkronigante la enhavon de dosierujoj. Do, mi mem ekuzis ĝin kaj konsilas ĝin al ĉiuj.

Kion havigas la programo? Fonan sinkronigadon de ajnaj dosierujoj en SD-karto de via telefono kun dosjerujoj en Dropbox — eblas elekti periodon de 5 minutoj ĝis 24 horoj. las krei diversajn taskojn por diversaj celoj. La sinkronigado povas esti elŝuta, alŝuta aŭ ambaŭflanka. Ekzemple, vi povas krei unu taskon por alŝuti ĉiuhore viajn novajn fotojn en iu dosierujon en Dropbox, alian por elŝuti novajn librojn ĉiutage, kaj la trian — por konstante (ĉiuj 5 minutoj) sinkronigi viajn dokumentojn kun Dropbox.

La aplikaĵo estas pagata. Ĝia senpaga (testa) versio permesas sinkronigi ne pli ol 15 dosierojn en unu tasko.

Nun anstataŭ Simplenote kaj similaj servoj eblas uzi Dropbox kun TheRealSync kaj ajna simpla kaj oportuna tekstredaktilo laŭplaĉe. Avantaĝo de tiu rimedo kompare kun Simplenote k.s. estas tia, ke ĉiuj viaj dokumentoj, notoj ktp ĉiam estas en la disko de via komputilo kaj SD-karto de la poŝtelefono — eĉ se vi perdus Interretan konekton, aŭ eĉ la retservo mem malaperus, vi perdus nenion. Kaj kompare kun specialaj aplikaĵoj por konservi tekstajn notojn en Dropbox (ekzemple, Epistle) vi estas libera uzi ajnan formaton de dokumentoj — ne nur simplan tekston.